en construción
un poemario que deixa ver como vai nacendo

15 de xaneiro de 2006

á vista do último material que fun escribindo estes meses, teño elementos para pensar que podo estar no camiño de construír un novo libro. e decido compartir esta experiencia coa xente que pasa por aquí.

cómo funcionará o proceso.

acabo de incluír nesta páxina da lúa gris un índice cos textos cos que conto ata o de agora para o libro. existen algunhas versións anteriores destes textos, algunhas mesmo xa publicadas ou no prelo dentro de edicións colectivas pero as que expoño aquí como primeiras versións son as que actualmente estou manexando.

as correccións que vaia facendo sobre os textos non anularán as versións anteriores senón que irei amosando todos os pasos.

tamén irán aparecendo textos novos e mesmo pode ocorrer que algúns textos se retiren.

de todo este proceso irei deixando constancia nunha bitácora que poño a funcionar hoxe mesmo. todas as persoas que pasen a visitar esta páxina ou a bitácora poden deixar alí os seus comentarios.

a idea é que mesmo poidan facer suxestións sobre os textos e propoñer correccións que, evidentemente, eu podo decidir ter en conta ou non.

non podo saber neste momento se vou rematar de escribir o libro. en todo caso, na bitácora irei deixando constancia de todo o proceso e o tempo dirá.

ogallá o pasedes ben compartindo esta aventura.